ՎԵՐԱՑՄԱՆ Ս. ԽԱՉԻ ՏՕՆԸ՝ ԹՈՐՈՆԹՈՅԻ ՄԷՋ

 

Կիրակի, 13 Սեպտեմբեր 2015-ի առաւօտեան ժամը 11։00-ին, Հայ Առաքելական Ս. եկեղեցւոյ Տաղաւար տօներէն՝ Վերացման Ս. Խաչի տօնին առիթով, Թորոնթոյի «Ս. Աստուածածին» եկեղեցւոյ մէջ մատուցուեցաւ Ս. եւ Անմահ Պատարագ, ներկայութեամբ եկեղեցւոյս Պատգամաւորներուն, Ազգ. Վարչութեան, Երեսփոխաններուն, Հոգաբարձութեան, Յանձնախումբերու ներկայացուցիչներուն, Հայ Կեդրոնէն ներս գտնուող միութիւններու ներկայացուցիչներուն եւ հաւատացեալ հոծ բազմութեան։ Ս. եւ Անմահ Պատարագը մատուցեց շրջանիս Հոգեւոր Հովիւ՝ Հոգշ. Տ. Ստեփանոս Վրդ. Փաշայեան։

 

ԽԱՉՎԵՐԱՑԻ ՄԵԾԱՀԱՆԴԷՍ ԹԱՓՕՐ  ԵՒ ԱՆԴԱՍՏԱՆ

Նոյն օրը, երեկոյեան ժամը 6։00-ին, Թորոնթոյի «Ս. Աստուածածին» եկեղեցւոյ մէջ կատարուեցաւ Խաչվերացի Մեծահանդէս Թափօր եւ Անդաստան, ներկայութեամբ Թորոնթոհայ բազմանդամ հաւատացեալներու։ Արծաթեայ սկուտեղի մը վրայ դրուած էր Ս. Խաչը, որ նոյնինքն Քրիստոսի խաչափայտէն մասունք մը ունի իր մէջ եւ զարդարուած ռեհանով եւ վարդեղէն ջուրով եւ պատուական կտաւով մը ծածկուած։

Եկեղեցւոյս Հոգեւոր Հովիւները զգեստաւորուած, իրենց կողքին ունենալով Սարկաւագներ, Կիսասարկաւագներ եւ Դպիրներ, բուրվառներով, քշոցներով եւ մոմեղէններով եւ շարականի քաղցրաթրթիռ երգեցողութեամբ, սաղմոսասացութեամբ եւ աւետարանի ընթերցողութեամբ օրհնեցին աշխարհի չորս կողմերը՝ Անդաստան կատարելով։

Իր խօսքին մէջ, Հոգշ. Հայր Սուրբը անդրադարձաւ Ս. Խաչի պատմականին եւ այդ խաչէն եկող խորհրդանիշներուն։ Ան ըսաւ. «Անցեալին Խաչը մահուան նշան էր, սակայն, երբ մեր Տէրը Յիսուս Քրիստոս եկաւ, Ս. Խաչը դարձաւ հաւատքի, համբերութեան ու զոհողութեան խորհրդանիշ, որ մեզ կը շարունակէ փրկել ամէն տեսակ փորձութիւններէ ու հիւանդութիւններէ…»։

Աւարտին, «Խաչի քո Քրիստոս…» շարականի երգեցողութեամբ, զարդարուած Ս. Խաչով ու «Պահպանիչ» աղօթքով օրհնուեցան հաւատացեալները եւ իրենց ուխտը վերանորոգեցին իրենց մայրենի եկեղեցւոյ։