ԵԿԵՂԵՑՒՈՅ ՀՈԳԵՒՈՐ ՀՈՎԻՒՆԵՐԸ ՆԵՐԿԱՅ ԿԸ ԳՏՆՈՒԻՆ ՀԱՅՈՑ ՑԵՂԱՍՊԱՆՈՒԹԵԱՆ 100 ԱՄԵԱԿԻ ԱՌԻԹՈՎ ԿԱԶՄԱԿԵՐՊՈՒԱԾ ԴԱՍԱԽՕՍԱԿԱՆ ԵՐԵԿՈՅԻ ՄԸ

Շաբաթ, 26 Սեպտեմբեր 2015-ի երեկոյեան ժամը 8։00-ին, Թորոնթոյի Հայ Աւետարանական եկեղեցւոյ մէջ, կազմակերպութեամբ եկեղեցւոյ Մշակութային Յանձնախումբին, տեղի ունեցաւ Հայոց Ցեղասպանութեան 100 ամեակի առիթով դասախօսական երեկոյ մը, նիւթ ունենալով «Ռուսիոյ, Վրաստանի եւ Աբխազիոյ Հայկական Գաղութներու Կեանքը» խորագրով։

Օրուան դասախօսն էր Հայ Աւետարանական Համաշխարհային Խորհուրդի եւ Ամերիկայի Հայ Աւետարանչական Ընկերակցութեան ներկայացուցիչ եւ Թորոնթոյի Հայ Աւետարանական եկեղեցւոյ ներկայ Հոգեւոր Հովիւ՝ Վերապատուելի Դոկտ. Ռընէ Լեւոնեան։

Սոյն դասախօսական երեկոյեան անձամբ հրաւիրուած էր նաեւ Տիրախնամ Թեմիս Առաջնորդ՝ Գերշ. Տ. Մեղրիկ Ս. Եպս. Բարիքեան, սակայն, նկատի ունենալով Լաւալի «Ս. Գէորգ» եկեղեցւոյ անուանակոչութեան տօնախմբութիւնները, չկրցաւ ներկայ գտնուիլ եւ զինք ներկայացուց Թորոնթոյի «Ս. Աստուածածին» եկեղեցւոյ Հոգեւոր Հովիւ՝ Հոգշ. Տ. Ստեփանոս Վրդ. Փաշայեան։ Սոյն ձեռնարկին յանուն «Ս. Աստուածածին» եկեղեցւոյ ներկայ էր նաեւ Արժ. Տ. Կոմիտաս Աւ. Քհնյ. Փանոսեան։