ԵԿԵՂԵՑՒՈՅՍ ՀՈԳԵՒՈՐ ՀՈՎԻՒՆԵՐՆ ՈՒ ՀՈԳԱԲԱՐՁՈՒԹԵԱՆ ԱՆԴԱՄՆԵՐԸ ՆԵՐԿԱՅ ԿԸ ԳՏՆՈՒԻՆ ԹՈՐՈՆԹՕ ԺԱՄԱՆՈՂ ՆՈՐ ՍՈՒՐԻԱՀԱՅԵՐՈՒ ԵՒ ԻՐԱՔԱՀԱՅԵՐՈՒ ԾԱՆՕԹԱՑՄԱՆ ՀԱՆԴԻՊՄԱՆ

 

           Ուրբաթ, 9 Հոկտեմբեր 2015-ի երեկոյեան ժամը 8։00-էն սկսեալ, հրաւէրովն ու կազմակերպութեամբը Թորոնթոյի Հ.Յ.Դ. «Ս. Թեհլիրեան» Կոմիտէին, Հայ Կեդրոնի սրահէն ներս տեղի ունեցաւ Թորոնթօ ժամանող նոր Սուրիահայերու եւ Իրաքահայերու ծանօթացման հանդիպումը, որուն ներկայ գտնուեցան նաեւ եկեղեցւոյս Հոգեւոր Հովիւներ՝ Հոգշ. Տ. Ստեփանոս Վրդ. Փաշայեան եւ Արժ. Տ. Կոմիտաս Աւ. Քհնյ. Փանոսեան, ինչպէս նաեւ Հոգաբարձութեան անդամներ։ Սոյն ծանօթացման հանդիպման ներկայ էր նաեւ Մոնթրէալի «Ս. Յակոբ» Առաջնորդանիստ Մայր եկեղեցւոյ Հոգեւոր Տեսուչ եւ նախկին Բերիոյ Հայոց Թեմի աւելի քան 27 տարիներու Բարեջան եւ ժրաջան Առաջնորդ՝ Գերշ. Տ. Սուրէն Սրբ. Արք. Գաթարոյեան։

          Տիրախնամ Թեմիս Առաջնորդ՝ Գերշ. Տ. Մեղրիկ Սրբ. Եպս. Բարիքեանի անունով խօսք առաւ եկեղեցւոյս Հոգեւոր Հովիւ՝ Հոգշ. Տ. Ստեփանոս Վրդ. Փաշայեան, որ իր սրտի անկեղծ գոհունակութիւնը յայտնելով բարի գալուստ մաղթեց բոլորին եւ քաջալերիչ ու խրախուսիչ խօսքերով ներկաներուն սրտերը գրաւեց։

          Աւարտին, Մոնթրէալի «Ս. Յակոբ» Առաջնորդանիստ Մայր եկեղեցւոյ Հոգեւոր Տեսուչ եւ նախկին Բերիոյ Հայոց Թեմի աւելի քան 27 տարիներու Բարեջան եւ ժրաջան Առաջնորդ՝ Գերշ. Տ. Սուրէն Սրբ. Արք. Գաթարոյեան յուզումնալից խօսքերով յիշեց Սուրիահայութեան եւ Իրաքայութեան դժբախտ վիճակը եւ իր Հայրական խօսքին մէջ գօտեպնդեց ներկաները, որպէսզի շարունակեն իրենց ազգային ոգիով լեցուած ու ներշնչուած նպաստը բերելու այս անգամ այս ցամաքամասին վրայ, ուր խաղաղ ու հանդարտ պայմաններու մէջ կը գտնուին։

          Սոյն պաշտօնական ծանօթացման հանդիպումը աւարտեցաւ Սրբազան Հօր «Պահպանիչ» աղօթքով։