ԳՈՀԱԲԱՆԱԿԱՆ ՕՐՈՒԱՆ ՃԱՇԿԵՐՈՅԹ

          Բարձր Հովանաւորութեամբ՝ Գանատայի Հայոց Տիրախնամ Թեմի Առաջնորդ՝ Գերշ. Տ. Մեղրիկ Սրբ. Եպս. Բարիքեանի, կազմակերպութեամբ Թորոնթոյի «Ս. Աստուածածին» եկեղեցւոյ Հոգաբարձութեան եւ նախագահութեամբ Տէր եւ Տիկ. Ռաֆֆի եւ Նորա Սարգիսեաններու, Կիրակի, 11 Հոկտեմբեր 2015-ի կէսօրուան ժամը 3։00-էն սկսեալ, Թորոնթոյի Lara’s ճաշարանէն ներս, տեղի ունեցաւ Գոհաբանական Օրուան աւանդական ճաշկերոյթը, ներկայութեամբ 200 ներկաներու։ Սոյն ճաշկերոյթին եւս ներկայ էին եկեղեցւոյս Հոգեւոր Հովիւներ՝ Հոգշ. Տ. Ստեփանոս Վրդ. Փաշայեան եւ Արժ. Տ. Կոմիտաս Աւ. Քհնյ. Փանոսեան։

          Օրուան ճաշկերոյթին ընթացքին, տեղի ունեցաւ գեղարուեստական կոկիկ յայտագիր։ Սեղանի օրհնութիւնը կատարեց՝ Արժ. Տ. Կոմիտաս Աւ. Քհնյ. Փանոսեան, ապա բացման խօսքը կատարեց՝ Հոգշ. Տ. Ստեփանոս Վրդ. Փաշայեան, որ բարի գալուստ մաղթեց բոլորին ու օրուան պատշաճ տեղեկութիւններ փոխանցեց ներկաներուն։ Ապա եկեղեցւոյս Քրիստոնէական Դաստիարակութեան Յանձնախումբի խումբ մը աղջիկներ եւ կամաւոր անձեր՝ Ռուբինա Քէօշկէրեան, Թալին Մազեան, Սեւան Թրթռեան, Դալար Ներսէսեան, Թիթեռ Քարկոցեան եւ Իզապէլ Յակոբեան զանազան տեսակի ազգային ու ժողովրդային երգերով, քանոնի նուագակցութեամբ՝ Մատիանա Թորոսեանի եւ արտասանութիւններով ճոխացուցին երեկոն։ Յայտագրի ընթացքին ներկաներուն կողմէ կատարուեցաւ նաեւ Գոհաբանական ու Փառաբանական աղօթքներու ընթերցում։

          Խօսք առին՝ Թորոնթոյի Հ.Յ.Դ. «Ս. Թեհլիրեան» Կոմիտէի Հերթապահ՝ Տիար Յակոբ Ճանպազեան ու եկեղեցւոյս Հոգաբարձութեան Ատենապետ՝ Տիար Գառնիկ Պուճուքեան, յիշելով յատկապէս մեր գաղութէն ներս նոր ժամանող Սուրիահայերուն եւ Իրաքահայերուն, անոնց թարգմանը ըլլալով՝ փառք ու շնորհակալութիւն յայտնելու հանգստաւէտ պայմաններու տակ հասնելու ու մնալու եւ բարձրօրէն գնահատելով այսպիսի ձեռնարկներ, որոնք աւանդութիւն դարձած կը շարունակեն մեզ առաւել եւս ճոխացնել։

          Ի վերջոյ, փակման խօսքը կատարեց եկեղեցւոյս Հոգեւոր Հովիւ՝ Հոգշ. Տ. Ստեփանոս Փաշայեան, բարձր գնահատելով եկեղեցւոյս Հոգաբարձութեան անդամ-անդամուհիները, յայտագրին բոլոր մասնակցողները, կազմակերպողները, նուիրատուները, կամաւորները ու ներկաները եւ յատկապէս Տէր եւ Տիկ. Ռաֆֆի եւ Նորա Սարգիսեանները, որոնք սիրայօժար կերպով ստանձնած էին օրուան նախագահութիւնը եւ այս առիթով անոնց յանձնեց յուշանուէր մը Գոհաբանական օրուան կապակցութեամբ։ Նշենք, որ սեղանններու կեդրոնի զարդարանքը հայթայթած էր եկեղեցւոյս Հոգաբարձութեան անդամ՝ Տիար Լեւոն Քէօշկէրեանի Ազնուամեծար Տիկինը՝ Սիւզան Քէօշկէրեան։

          Ձեռնարկը աւարտեցաւ Հոգշ. Հայր Սուրբի «Պահպանիչ» աղօթքով։

IMG_0317 IMG_0316 IMG_0314 IMG_0310 IMG_0301 IMG_0304 IMG_0307 IMG_0308 IMG_0309 IMG_0300 IMG_0299 IMG_0298 IMG_0297 IMG_0296 IMG_0295 IMG_0294 IMG_0291 IMG_0290 IMG_0283 IMG_0275 IMG_0268 IMG_0267 IMG_0265 IMG_0250