ԵԿԵՂԵՑՒՈՅՍ ՀՈԳԵՒՈՐ ՀՈՎԻՒՆԵՐԸ ԻՐԵՆՑ ՄԱՍՆԱԿՑՈՒԹԻՒՆԸ ԿԸ ԲԵՐԵՆ ԴՊՐԱՑ ԴԱՍԵՐՈՒ ՀԱՄԱԽՄԲՈՒՄԻՆ

           Կազմակերպութեամբ Գանատայի Հայոց Թեմի Քրիստոնէական Դաստիարակութեան Խորհուրդին եւ հիւրընկալութեամբ Թորոնթոյի «Ս. Աստուածածին» եկեղեցւոյ, Ուրբաթ, 23 Հոկտեմբերէն մինչեւ Կիրակի, 25 Հոկտեմբեր 2015-ը, եկեղեցւոյս «Յովնանեան» ներքնասրահէն ներս տեղի ունեցաւ Դպրաց Դասերու Համախմբումը (Մոնթրէալ, Լաւալ, Գէմպրիճ եւ Թորոնթօ), որուն ներկայ գտնուեցան ու իրենց մասնակցութիւնը բերին նաեւ  եկեղեցւոյս Հոգեւոր Հովիւներ՝ Հոգշ. Տ. Ստեփանոս Վրդ. Փաշայեան եւ Արժ. Տ. Կոմիտաս Աւ. Քհնյ. Փանոսեան։ Անոնք, համաձայն օրակարգին ու ժամանակացոյցին, իրենց մասնակցութիւնը բերին բարի գալուստի խօսքով, շարականի բացատրութեամբ եւ ուսուցմամբ, ինչպէս նաեւ խորհրդածութիւն կատարելով։

           Մոնթրէալէն եւ Լաւալէն ժամանողները հասան Ուրբաթ գիշեր եւ Հայ Կեդրոնի կողքին գտնուող Radisson պանդոկին մէջ իջեւանեցան։ Շաբաթ առաւօտեան ժամանեցին Գէմպրիճէն, ինչպէս նաեւ Թորոնթոյի Դպրաց Դասի անդամ-անդամուհիները։ Շաբաթ օր ամբողջութեամբ գործադրուեցաւ օրակարգն ու ժամանակացոյցը եւ երեկոյեան ժամը 4։30-ին, ներկաներու մասնակցութեամբ տեղի ունեցաւ Երեկոյեան Ժամերգութիւն։ Նոյն օրը, աւելի ուշ, նոյն սրահէն ներս տեղի ունեցաւ ուրախ երեկոյ, որու աւարտին, Հոգշ. Հայր Սուրբը իր բարձր գնահատանքն ու շնորհակալութիւնը յայտնեց բոլոր անոնց, որոնք սիրայօժար կերպով նեցուկ կանգնեցան, ե՛ւ նիւթապէս, ե՛ւ բարոյապէս։ Հոգշ. Հայր Սուրբը տեսնելով 3 պատանիներու մասնակցութիւնը սոյն համախմբումին, յանուն Թորոնթոյի «Ս. Աստուածածին» եկեղեցւոյ, իր բարձր գնահատանքը արտայայտեց եւ իւրաքանչիւրին նուիրեց գեղեցիկ խաչ մը։

         Կիրակի օր, եկեղեցւոյս մէջ մատուցուեցաւ Ս. եւ Անմահ Պատարագ։ Ս. Պատարագը մատուցեց՝ եկեղեցւոյս Հոգեւոր Հովիւ՝ Հոգշ. Տ. Ստեփանոս Վրդ. Փաշայեան։ Ան իր քարոզի բնաբանը առած էր օրուան ճաշու ընթերցուածէն՝ «Տէրը իր վարձատրութիւնը չի զրկեր ոեւէ մէկուն» (Ես 33.24) բնաբանով, ինչպէս նաեւ անդրադարձաւ Դպրաց Դասերու Համախմբումին մասին։ Ս. Պատարագի երգեցողութիւնը կատարուեցաւ Միացեալ Դպրաց Դասերու անդամ-անդամուհիներուն կողմէ, ղեկավարութեամբ Տիար Մելքոն Քարկոցեանի։ Պատարագէն ետք մասնակցողները մեկնեցան իրենց վայրերը, նոր թափ ստանալով ու նոր ոյժ ներմուծելով իրենց Դպրաց Դասերու մէջ։

12045413_711667862301027_4244690733141699813_o 12047060_711667792301034_9188173728910137600_n 12182575_711667925634354_4847413540149996944_o 12194617_711667892301024_2220857820788350174_o IMG_0073 IMG_0074 IMG_0075 IMG_0090 IMG_0100 IMG_0131 IMG_0134 IMG_0135 IMG_0136 IMG_0138 IMG_0139 IMG_0141 IMG_0143 IMG_2636 IMG_2640 IMG_2641 IMG_2642 IMG_2647R1 IMG_2649R IMG_8696 IMG_8698 IMG_8699 IMG_8700 IMG_8745 IMG_8747 IMG_8748 IMG_8749 IMG_8774 IMG_8777 IMG_8783 (1) IMG_8783 IMG_8787 (1) IMG_8787 IMG_8790 IMG_8792