ԵԿԵՂԵՑՒՈՅՍ ՀՈԳԵՒՈՐ ՀՈՎԻՒՆ ՈՒ ՀՈԳԱԲԱՐՁՈՒԹԵԱՆ ՆԵՐԿԱՅԱՑՈՒՑԻՉՆԵՐԸ ԻՐԵՆՑ ՆԵՐԿԱՅՈՒԹԵԱՄԲ ԿԸ ՄԱՍՆԱԿՑԻՆ ԳԷՄՊՐԻՃԻ «Ս. ՆՇԱՆ» ԵԿԵՂԵՑՒՈՅ ՏԱՐԵԿԱՆ ՃԱՇԿԵՐՈՅԹ-ՊԱՐԱՀԱՆԴԷՍԻՆ, ՎԷՄՔԱՐԻ ՕՐՀՆՈՒԹԵԱՆ ԵՒ ՏԷՐՈՒՆԻ ՍՐԲԱՊԱԿՏԵՐՆԵՐՈՒ ՕԾՄԱՆ

         Շաբաթ, 7 եւ Կիրակի 8 Նոյեմբեր 2015-ը, Գէմպրիճի «Ս. Նշան» Եկեղեցւոյ համար ուրախալի ու զուարճալի օրեր էին, երբ եկեղեցին տօնախմբեց իր անուանակոչութեան օրը եւ այս առթիւ, Շաբաթ, 7 Նոյեմբերի երեկոյեան, Հայ Կեդրոնի սրահէն ներս տեղի ունեցաւ եկեղեցւոյ տարեկան ճաշկերոյթ-պարահանդէսը, որուն ներկայ գտնուեցան նաեւ Ազգ. Վարչութեան Փոխ-Ատենապետ՝ Տիար Յարութ Գասապեան, Ազգ. Վարչութեան անդամներ՝ Օրդ. Ժիւլիէթ Սարգիսեան եւ Տիկ. Օսիկ Մխսիարթինեան, եկեղեցւոյս Հոգաբարձութեան Ատենապետ՝ Տիար Գառնիկ Պուճուքեանն ու Ատենապետուհի՝ Տիկ. Արմինէ Պետրոսեանը։

         Առ այդ, Կիրակի առաւօտեան ժամը 9։15-ին, Հոգեշնորհ Հայր Սուրբը, ընկերակցութեամբ Ազգ. Վարչութեան Անդամուհի՝ Օրդ. Ժիւլիէթ Սարգիսեանի եւ Տիկ. Գեղուհի Պասթաճեանի մեկնեցան Գէմպրիճ եւ Կիրակի, 8 Նոյեմբեր 2015-ի առաւօտեան ժամը 11։00-էն սկսեալ, Գէմպրիճի «Ս. Նշան» Եկեղեցւոյ մէջ մատուցուեցաւ հանդիսաւոր Ս. եւ Անմահ Պատարագ։ Ս. եւ Անմահ Պատարագը մատուցեց եւ իր Հայրական Պատգամը փոխանցեց՝ Տիրախնամ Թեմիս Առաջնորդ՝ Գերշ. Տ. Մեղրիկ Ս. Եպս. Բարիքեան։ Ս. Պատարագի աւարտին, տեղի ունեցաւ Վէմքարի օրհնութիւն եւ երկու Տէրունի սրբապատկերներու օծում։ Այս առթիւ, եկեղեցւոյս Հոգեւոր Հովիւ՝ Հոգշ. Տ. Ստեփանոս Վրդ. Փաշայեան եւս մասնակցեցաւ սոյն հոգեպարար արարողութեանց եւ ապա վերադարձաւ Թորոնթօ։

index