ԵԿԵՂԵՑՒՈՅՍ ՀՈԳԵՒՈՐ ՀՈՎԻՒՆԵՐԸ, ԱԶԳ. ՎԱՐՉՈՒԹԵԱՆ, ԱԶԳ. ՊԱՏԳԱՄԱՒՈՐՆԵՐՈՒ, ԱԶԳ. ԵՐԵՍՓՈԽԱՆՆԵՐՈՒ ԵՒ ՀՈԳԱԲԱՐՁՈՒԹԵԱՆ ԱՆԴԱՄ-ԱՆԴԱՄՈՒՀԻՆԵՐԸ ԿԸ ՄԱՍՆԱԿՑԻՆ ՔԻՆԿՍԹԸՆԻ ՄԷՋ ՀՈԳԱԲԱՐՁՈՒԹԵԱՆ ԵՒ ԱԶԳ. ԵՐԵՍՓՈԽԱՆՆԵՐՈՒ ՄԻՕՐԵԱՅ ԽՈՐՀՐԴԱԺՈՂՈՎԻՆ

       Շաբաթ, 14 Նոյեմբեր 2015-ի առաւօտեան կանուխ ժամերուն, եկեղեցւոյս Հոգեւոր Հովիւներ՝ Հոգշ. Հայր Սուրբը, Արժ. Տէր Հայրը, ինչպէս նաեւ Ազգ. Վարչութեան, Ազգ. Պատգամաւորներու, Ազգ. Երեսփոխաններու եւ Հոգաբարձութեան անդամ-անդամուհիներու մեծամասնութիւնը մեկնեցան Քինկսթըն (Kingston), մասնակցելու Հոգաբարձութեան եւ Ազգ. Երեսփոխաններու Միօրեայ Խորհրդաժողովին։

            Առ այդ, առաւօտեան ժամը 10։00-էն մինչեւ երեկոյեան ժամը 4։00, Քինկսթընի (Kingston) Delta Kingston Waterfront Hotel-ին մէջ, նախագահութեամբ Գանատայի Հայոց Տիրախնամ Թեմի Առաջնորդ՝ Գերշ. Տ. Մեղրիկ Ս. Եպս. Բարիքեանի, տեղի ունեցաւ Հոգաբարձութեան եւ Ազգ. Երեսփոխաններու Միօրեայ Խորհրդաժողովը, որու ընթացքին ներկայացուեցան Գանատայի Հայոց Թեմի բոլոր եկեղեցիներու գրաւոր զեկոյցները, կատարուեցան աշխատանոցներ ղեկավարութեան թեմա ունենալով, ինչպէս նաեւ ներկայացումներ։ Հոգշ. Հայր Սուրբը եւս ընթերցեց եկեղեցւոյս գրաւոր զեկոյցը, ինչպէս նաեւ Արժ. Տէր Հայրն ու մեր ժողովականները իրենց առաջարկներով ու հարցումներով մասնակցեցան սոյն հաւաքին։

       Աւարտին, Առաջնորդ Սրբազան Հայրը բարձրօրէն գնահատեց բոլոր մասնակցողները, յատկապէս Հոգաբարձութեան եւ Ազգ. Երեսփոխաններու ներկայութիւնը եւ այս ժողովէն ներշնչուած յորդորեց բոլորին, ըսելով. «Վարչական գործին կողքին եւս, Ձեր մէջ արմատաւորեցէք աղօթական կեանքը։ Աղօթեցէք մի՛շտ եւ պիտի տեսնէք թէ ձեր կեանքն ու մանաւանդ վարչական գործունէութիւնը հեզասահ պիտի ընթանայ…։ Ինչ որ կ’ընէք, հաւատքո՛վ ըրէք, ինչ որ կ’իրագործէք՝ շնորհակալ եղէք Աստուծոյ եւ ինչ որ կը յաջողիք՝ Անոր փառքին նուիրեցէ՛ք»։ Ապա, «Յիշեա, Տէր, զպաշտօնեայս քո…» աղօթքով փակեց խորհրդաժողովը։

       Ապա, անոնք վերադարձան Թորոնթօ։

kingston