ԵԿԵՂԵՑՒՈՅՍ ՀՈԳԵՒՈՐ ՀՈՎԻՒՆԵՐՆ ՈՒ ԱԶԳ. ՎԱՐՉՈՒԹԵԱՆ ԱՆԴԱՄ-ԱՆԴԱՄՈՒՀԻՆԵՐԸ ԿԸ ՄԱՍՆԱԿՑԻՆ ՀՈԳԵԼՈՅՍ Տ. ԱՐՄԷՆ ԱՒ. ՔՀՆՅ. ԻՇԽԱՆԵԱՆԻ ՏԱՆ ԿԱՐԳԻՆ, ՎԵՐՋԻՆ ՕԾՄԱՆ ԵՒ ԹԱՂՄԱՆ ԱՐԱՐՈՂՈՒԹԵԱՆՑ

        Գանատայի Հայոց Թեմի Ազգ. Առաջնորդարանի տեղեկութիւններուն հետեւելով, իմացանք Մոնթրէալի «Ս. Յակոբ» Առաջնորդանիստ Մայր եկեղեցւոյ Պատուակալ Հովիւ՝ Արժ. Տ. Արմէն Աւ. Քհնյ. Իշխանեանի վախճանումը։ Առ այդ, Հինգշաբթի, 3 Դեկտեմբեր 2015-ի առաւօտեան, եկեղեցւոյս Հոգեւոր Հովիւներ՝ Հոգշ. Տ. Ստեփանոս Վրդ. Փաշայեան եւ Արժ. Տ. Կոմիտաս Աւ. Քհնյ. Փանոսեան, ինչպէս նաեւ Ազգ. Վարչութեան անդամ-անդամուհիներ՝ Օրդ. Ժիւլիէթ Սարգիսեան, Տիար Յարութիւն Գասապեան եւ Տիկ. Օսիկ Մխսիարթինեան մեկնեցան Մոնթրէալ եւ մասնակցեցան Հոգելոյս Տէր Հօր Տան Կարգին, Ս. եւ Անմահ Պատարագին, Վերջին Օծման եւ Թաղման արարողութեանց։

     Առ այդ, Հինգշաբթի երեկոյեան ժամը 5։00-էն սկսեալ, «Կոմիտաս» մեռելատան մէջ տեղի ունեցաւ Հոգելոյս Տէր Հօր Տան Կարգի արարողութիւնը, ապա երեկոյեան ժամը 7։00-ին Մոնթրէալի «Ս. Յակոբ» Առաջնորդանիստ Մայր եկեղեցւոյ մէջ մատուցուեցաւ Ս. եւ Անմահ Պատարագ։ Ս. Պատարագը մատուցեց, Վերջին Օծումը կատարեց եւ իր Հայրական Պատգամը փոխանցեց Տիրախնամ Թեմիս Առաջնորդ՝ Գերշ. Տ. Մեղրիկ Ս. Եպս. Բարիքեան։ Իր դամբանական խօսքին մէջ Առաջնորդ Սրբազան Հայրը վեր առաւ Հոգելոյս Տէր Հօր բարեմասնութիւններն ու արժանիքները ու յատկապէս իր խօսքին մէջ ըսաւ. «Տէր Արմէնը Արժանապատի՛ւ էր, որովհետեւ Սաղմոսերգու Դաւիթին խօսքերուն Թարգմանը եղաւ իր պարզունակ կեանքով…։ Տէր Արմէնը Արժանապատի՛ւ էր, որովհետեւ ապրեցաւ իր խոնարհ, բարի ու հաղորդական կեանքով…։ Տէր Արմէնը Արժանապատի՛ւ էր, որովհետեւ Սաղմոսերգուին բառերը կեանքի եւ ապրումի վերածեց…։ Տէր Արմէնը Արժանապատի՛ւ էր, որովհետեւ իր կեանքի բոլոր օրերուն, հանգստեան կոչուելէն ետքն իսկ, ո՛չ մէկ օր ինքզինք զրկեց Աստուծոյ տունէն, աղօթքէն եւ իր ժողովուրդէն…»։

          Յաջորդ օր՝ Ուրբաթ առաւօտեան ժամը 11։00-ին, Մոնթրէալի «Ս. Յակոբ» Առաջնորդանիստ Մայր եկեղեցւոյ մէջ կատարուեցաւ Թաղման Կարգը եւ ապա տարուեցաւ Գերեզմանատուն։ Գերեզմանատունէն ետք, «Ահարոնեան» սրահէն ներս տեղի ունեցաւ Հոգեճաշ։ Այս տխուր առիթով, Թորոնթոյի «Ս. Աստուածածին» եկեղեցւոյ Հոգեւոր Հովիւներն ու Հոգաբարձութեան անդամ-անդամուհիները մասնակցեցան պատշաճ ծաղկեպսակով մը։

          Ուրբաթ եւ Շաբաթ օրերը, յաջորդաբար Հոգշ. Հայր Սուրբը, Արժ. Տէր Հայրն ու Ազգ. Վարչութեան անդամ-անդամուհիները վերադարձան Թորոնթօ։

12303976_446144215584031_3277855129995259903_o 12304550_446144395584013_9054983789376607108_o 12307445_446144312250688_6352901993166823368_o 12307511_446146412250478_9218965523969706147_o 12308028_446144242250695_8885892456928641973_o (1) 12308028_446144242250695_8885892456928641973_o 12308086_446144438917342_3591650680039503738_o 12308093_446144158917370_3820646467168278829_o 12308102_446146385583814_4891058844783393483_o 12309560_446144198917366_2154634002390357874_o 12309607_446144415584011_8215054043027399824_o 12309883_446144012250718_4080176127456307447_o 12309951_446145062250613_4561091908131005671_o 12314638_446144295584023_2601305957030781911_o 12322522_446145812250538_1294776866793310928_o 12322829_446144125584040_3734576549502233915_o 12339071_446146515583801_4454123831767674159_o 12339126_446144385584014_3803036488830323880_o 12339305_446144548917331_5485397357883665689_o 12339369_446144348917351_7824337281208690306_o 12339633_446146392250480_5982169231812917191_o