ԹԵՄԱԿԱԼ ԱՌԱՋՆՈՐԴ ՍՐԲԱԶԱՆ ՀԱՅՐԸ ԿԸ ՆԱԽԱԳԱՀԷ ՏՈՀՄԻԿ ՕՐՈՒԱՆ ԳԵՂԱՐՈՒԵՍՏԱԿԱՆ ՁԵՌՆԱՐԿԻՆ

      Շաբաթ, 5 Դեկտեմբեր 2015-ի երեկոյեան ժամը 7։30-ին, հրաւէրովն ու կազմակերպութեամբ Հ.Օ.Մ.ի Թորոնթոյի «Ռուբինա» Մասնաճիւղի Վարչութեան եւ Տոհմիկ Օրուան Յանձնախումբին, Հայ Կեդրոնի սրահէն ներս, նախագահութեամբ Գանատայի Հայոց Տիրախնամ Թեմի Առաջնորդ՝ Գերշ. Տ. Մեղրիկ Ս. Եպս. Բարիքեան, ընկերակցութեամբ Թորոնթոյի «Ս. Աստուածածին» եկեղեցւոյ Հոգեւոր Հովիւներուն՝ Հոգշ. Տ. Ստեփանոս Վրդ. Փաշայեանի եւ Արժ. Տ. Կոմիտաս Աւ. Քհնյ. Փանոսեանի ներկայ գտնուեցան Տոհմիկ Օրուան պաշտօնական ու գեղարուեստական ձեռնարկին, որ նուիրուած էր Հայոց Ցեղասպանութեան 100-ամեակին եւ ձօնուած՝ Արեւմտահայաստանի Նահանգներուն եւ Հայաբնակ Շրջաններուն։

          Նախքան սեղանի օրհնութիւնը, իր Հայրական Պատգամը փոխանցեց Թեմակալ Առաջնորդ Սրբազան Հայրը, բարձր գնահատելով Հ.Օ.Մ.ի «Ռուբինա» Մասնաճիւղի Վարչութեան գործունէութիւնն ու Տոհմիկ Օրուան Յանձնախումբի կատարած անխոնջ աշխատանքը ու յորդորեց նո՛յն ոգիով շարունակել մինչեւ պայքարի յաղթանակ։ Առաջնորդ Սրբազան Հայրը յատկապէս անդրադառնալով օրուան կոկիկ ու բարձրորակ գեղարուեստական յայտագրին, ըսաւ. «Այսպիսի Հայկական տոհմիկ սովորութիւններ ու աւանդութիւններ երբե՛ք պէտք չէ մոռացութեան ձգուին ու նմանօրինակ ձեռնարկներ կը միտին մեր ապագայ սերունդի շարունակականութեան սկիզբ դնելու գաղափարը վառ պահել…»։ Ապա կատարեց սեղանի օրհնութիւնը, եւ ընկերակցութեամբ Հոգշ. Հայր Սուրբին եւ Հ.Օ.Մ.ի «Ռուբինա» Մասնաճիւղի Վարչութեան Ատենապետուհի՝ Տիկ. Արմիկ Սաֆարեանին, իւրաքանչիւր սեղան այցելեց եւ իր օրհնութիւնները փոխանցեց ներկաներուն։

20151205_210116 20151205_221625 20151205_223941 20151205_224109 20151205_224154